აშშ-ს აერონავტიკისა და კოსმოსის ეროვნულმა ადმინისტრაციამ (NASA), მიმდინარე წლის ნოემბრამდე შეაჩერა კონტრაქტი ამერიკულ კომპანია SpaceX– თან, ადამიანის მთვარეზე დაფრენის კუთხით,- ამის შესახებ ინფორმაციას SpaceNews-ი ავრცელებს. “ნასამ” გადაწყვიტა კონტრაქტის „გაყინვა“ ჯეფ ბეზოსის კომპანია Blue Origin– ის მიერ წამოწყებული სასამართლო პროცესის დაჩქარების მიზნით, რომელმაც მიმართა აშშ -ს სასამართლოს ფედერალური შუამდგომლობებით, რათა გადაემოწმებინა “ნასას” მიერ ილონ მასკის კომპანიის არტემიდის პროგრამაში მონაწილეობის კანონიერება. სწორედ ამ პროგრამის ფარგლებში, NASA, SpaceX– თან ერთად, მუშაობს პროექტზე, ადამიანის უსაფრთხოდ დასაფრენად მთვარეზე 2024 წელს.
საყურადღებოა ის ფაქტი, რომ 967 მილიონი დოლარი გამოიყო ამ პროექტის განვითარებისათვის. ილონ მასკის კომპანიამ შესაბამისი კონტრაქტი მიიღო მიმდინარე წლის აპრილში. თუმცა, ამავე დროს, Blue Origin– მა პროტესტი გამოხატა აშშ – ს აუდიტის სამსახურში, NASA– ს მიერ SpaceX– ის არჩევანის გაკეთების გამო. ბეზოსს მიაჩნია, რომ კოსმოსურმა სააგენტომ არ მისცა Blue Origin- ს შესაძლებლობა გადახედონ თავიანთ წინადადებას, რადგან სააგენტომ პროგრამისთვის ბიუჯეტი შეამცირა. თავიდან დაგეგმილი იყო ორი პრეტენდენტის არჩევა, მაგრამ დაფინანსების შემცირების გამო, ეს შეუძლებელი გახდა.
30 ივლისს აშშ – ს აუდიტის სამსახურმა უარყო Blue Origin– ის პროტესტი და კიდევ ერთხელ დაადასტურა NASA– ს არჩევანი. 13 აგვისტოს Blue Origin– მა შეიტანა სარჩელი NASA– ს წინააღმდეგ. ბეზოსის კომპანიამ, სარჩელში სააგენტოს გარიგებას SpaceX– თან უსამართლო და პრობლემური უწოდა.
ამასთან დაკავშირებით სააგენტომ “ნებაყოფლობით შეაჩერა მუშაობა” ილონ მასკის კომპანიასთან 19 აგვისტოდან 1 ნოემბრამდე.
თამო თავხელიძე
